Chin ramkulh, Kanpalet pengsungih zatlang mipi kaihruaitu pawl ih hohanak thawn peng 8 le falon 2 sau mi, lamzin cu a hmai sabik an mahte an ceh suak thu Chin mipi humhimtu CDF-Kanpalet Brigadier in a sim.
မုန်းချောင်း nisuahnak lam le nitlaknak lam pehtlaihawknak asi ih Kanpalet ihsin Mindat tiang feh theinak lamzin cu tuithla March thlasung ah an rak cek suak zo.
CDF Kanpetlet Brigadier Salai Tun Ling Thang in “Himi lamzin cu ahmai sabik kan mahte zin kan ceh mi a si. Cepit hmang thei lo dinhmun kan si tik ah motor cycle tal feh thei dingin kan zuam. Cumi hnu in motor feh thei dingin le thilri thiar thei dingin kan tuah mi a si” tiah a sim.
Kanpalet pengih nisuahnak le nitlaknak lam pehtlaihawknak ကျင်ဒွေး lamzin cu SAC ralhrang pawl in 2021 ihsin feh an rak kham zo. Curaungah mipi pawl feh sukso thei dingin le eiin thilri hleiah, zatlang mipi in lamzin harsatnak kan neih hi kum 2 lenglo a si thlangih cui harsatnak pahtlang thei dingin an tuah mi a si tiah Kanpalet Zatlang kaihruaitu pawl in thu an suah.
Hi zinthar an ceh mi a onnak cu March ni 14 ah tuah a si. A tuvek ih an tuan theinak cu tualsung mipi pawl ih sumpai le thazang thawn telpinak, ramleng thlengtu pawl ih bawmnak le a dang pawlkom pawl ih bawmnak thawn an tuah suak mi a si tiah Kapalet Zatlang hruai thu pawl in an thu suah mi sungah an tarlang.
