Chin ramkulh thlanglam, Kanpalet pengsung, khaw then khat pawl le raltlan camp pawl ah tualsung mi minung 300 hrawng sungdawk in an naa ih cumi sungah nauhak 3 khal sungdawk in an thi zo tiah theih a si.
Sungdawk ih a thi tu nauhak pathum pawl cu အမ်ပုံ၊ စမ္မသား၊ ငုံလောင်း khaw pawl ihsin an si ih March ni 13 in March ni 18 karlak lak ih thi mi an si tiah hmin lang duh lo tualsung mipakhat in a rel.
Anih cun “Khawte pawl ah hivek ih naa an tam. Kum khat in kum 10 karlak nau hak pawl ah sungdawk tuar an tam. An sungdawk ruangah an tak sa ih Neumonia nat khal an tuar. Kum 2 hnuai nauhak 3 an thi zo” tiah a sim.
Tufang ah sungdawk nat a tuartu kum 1 hnuai nau hak minung 50 lenglo le kum 10 hnuailam nauhak minung 150 hrawng an um ih, upa lam sungdawk ih naa minung 100 hrawng an um ding tiah tualsung mipawl in an sim.
Kanpalet peng sungah kan dung zarh lam ihsin sungdawk le pum naa an tuar thok ih nauhak le upa an a zaten minung 300 hrawngin hi nat an tuar. Siivai an daihawk lo ruangah hlawmawknak ding an harsat tiah tualsung mipawl in an sim.
Hi thuthawn pehpar in Chin ramkulh SAC spoke person ဦးသန့်ဇင် cu RFA in phone thawn an thu le sut fiang dingin an ko rero nan phone a la thei lo.
Kanpalet pengsungah SAC ralhrang pawl in phone line an phih sak ruangah hardamnak lam poipeng a thlen caan ah pehtlaihawknak an harsat thu tualsung mipawl in an sim.
Aliam cia caan 2022 kum sung khal ah Kanpalet peng ih raltlan camp pawl ah hardamnak lamih an tuam hlawmawk thei lo ruangah nauhak 7 le upa minung 10 an thi tiah tualsung mipawl in an rel.
