Sagaing ramṭhen Chinram Kalay Khawpi Ralkap council ih Regional Command Headquarters ihsin pawksuak tu Rlakap motor pakhat cu Operation Momo timi hriamkai pawlkom in tuisun July 23 zingpit nazi 7:30 hrawng ah khan Kalay khawpi sung ရွေစင်-၂ rawldawr hmai ah Bomb an rak do tiah theih a si.

Ralkap motor cu bomb an puah ngah fuh ih Control thei nawn loin an kiang ih thinkungpi a pah, motor sung i to Ralkap 4 an thi, hriamtuar khal an tamzet tiah Operation Momo pawlkom cun an sim. Bomb kan puah mi in Motor khaltu a ngah a si bik ko ding, motor cu khaltu neilo vekin cak zetin a feh vivo ih a cawl thei nawn lo, tiin an sungtel pakhat cun a sim.

Motor sungih ralkap pawl cun Ihkhun 100 tlem Sizung kilven hnaṭuan Ralkap dangpawl cu bawmnak dil in phone an call nan, cui’ bomb puah an tawnnak hmun cu sizung kilvengtu Ralkap pawl cun an feh ngamlo thu an sim tiah sungtel cun a sim peh. Khawsung ih doawknak lam cangvaih cu a harsa zet ih ṭih khal a nung nasa, cemliam mi khal a tam, ram mipi khalin nan ti thei tawk cio in bawmnak pe dingah Operation Momo pawl cun dil ngennak an nei.

Cun Ralkap council hriamkai pawl thawn naivai ah umlo dingin le an ṭanhmun kuarnak pawl kiangkap khalah um lo dingin mipi ralrin pek theihternak an nei cih.