Sagiang ramthen, Kalay tonship ah tuini March ni 23 zinglam ihsin SAC ralhrang pawl in khawsung mipi pawl ih motor 100 hrawng hramhram in an hman sak tiah Kalay khawsung hminlang duh lo pakhat hnen in theih a si.
Hramhram ih motor an hman sak mi motor ke 12 ih a zial hnuai ta bik ah ralthuam phun kim ret in, ralthuam tlun ihsin ralhrang pawl ih eiin ding Fangcang le a dang eiin pawl thawn an khuh tiah motor khal tu pawl in an rel.
“Motor par ah thliri an san rero lai. A rei hlan ah motor an suak ding ka zum. Khuinah lam pan in an suak ding ti cu kan thei hrih lo” tiah hramhram ih motor an hman sak mi pakhat hnen in theih a si.
SAC ralhrang pawl cu kum dang pawl khal ah thalpau a thlen tin ten meithal, cerek le a dang eiin thilri pawl an kuat aw theu.
March zarhkhatnak ihsin thok in SAC ralhrang pawl cu Chin ramkulh Falam in Hakha lam ah siseh, Mindat ihsin matupi lam ah siseh ralthuam le eiin an phurh awk thu theih a si.
