Sagaing ramthen, kalay khawpi, March ni 27 ralhrang ralkap ni ah SAC ralhrang pawl cun khawsung kilhimnak cik zet in kilkip ah tuah na cingin khawsung hmun thenkhat pawl ahcun thil puak awn, meithal awn pawl theih ding a um tiah khawsung mipawl in an sim.
Kalay khawsungih cangvaitu Special Underground ralkap pawl cun Taungzalat vengih, စသုံးလုံး zung an kah hnu in, Kalay khawpi sungih um mi rahrang pawl in khawpi sak le thlanglam ah ralthuam pi an kap suak tiah SUG sungtel pakhat in a sim.
Anih cun “SAC ralhrang pawl, an thih le hriam dinhmun cu kan thei lo. an nih cun ralthuampi thawn in kap. kan mai zumnak ahcun ralhrang lam in, sinak sang kikawng pakhat hrawng an thih ruangah si ding. hi tluk in ralthuampi an kap. Kan nih lam cu thi le hriam tuar kan um lo” tiah a sim.
SAC ralhrang pawl ih ralthuampi an kah ruangah kalay khawpi sak le thlang ih um tu, khawte ih um tu mipi pawl cu thlaphang in an um tiah khawte lam ih um tualsung mipawl in an sim.
Ralhrang pawl ih an kah mi ralthuampi 120 mm 5 cu kalay saklam Letpanchaung khawsungah mu hnih tla in mu 3 sawn cu a puak awn lawng kan thei ih a tlaknak hmun ciah kan thei lo tiah an sim. Himi ralthuampi tlaknak hmun kiangih um tualsung mipakhat kum 30 hrawngmi nunau pakhat cu a nunnak hrang seherh um lo mi, a kawngih hriam a ngah thu theih a si.
Cuitlunah ralhrnag pawl ih ralthuampi an kah mi pakhat cu puak lo in leilung sungah pi 5 thuk in a lut tiah khawsung mipawl in an rel.
