Sagaing ramthen, Kalay ihsin Chinram kulh Falam ih a so tu SAC ralhrang pawl cu Chin National Defense Force in karlak ih an rak donak ruangah ralhrang lam in minung 20 lenglo an thi tiah CNO/CNDF in March ni 21 zaan ah thu an suah.
March ni 12 ihsin March ni 19 tiang zarh khat sung doawknak thu hla an tarlang mi ah SAC ralhrang lam ihsin minung 20 lenglo an thi tiah theihternak an nei.
March ni 12 ah SAC ralhrang pawl cu Varung lante ah bomb puah tuar in pakhat a thi ih, hriam ngahtu khal an um tiah an sim. March ni 14 ah SAC ralhrang pawl cu Zawnglei khaw lan ah ttum hnih bomb dirh puah an tongin ralhrang lam in minung 4 thi in, Motor Ke 12 nei, hman theih nawn lo ih a siat ruangah lamzin ah an tan lan tiin thu an suah.
Cumi zaanlam khal ah Zawnglei le Htinsho sakhan karlak ah rak do sal an si ih Sac ralhrang lam in minung 8 thi in, thi le hnai thawn hriam ngahtu tampi an um tiah an tarlang. March ni 17 Parte khaw kiang doawknak khal ah SAC ralhrang lam in miung 3 an thi tiah an sim.
March ni 17 ni khal ah Parte lante ah ttum 3 karalak ih rak do an si ih ralhrang lam 5 thi in hriam ngahtu an um tiah an tarlang. March ni 19 khal ah Congheng le C.Zamual karlak ah padita bomb thawn do an si thu, cui doawknak ah SAC ralhrang lam ihsin thi hlo zat theih fiang a si lo tiah CNDF in thu an suah.
Hi doawknak sungah SAC ralhrang pawl hnen in Cerek, pal bomb, Igana bomb, ralthuam thilri laksak ngah an si tiah an tarlang.
