India-Myanmar ramri tluan a si mi, Sagaing ramthen, Tamu peng sungah SAC ralhrang pawl le mipi humhimtu tangrual ralkap pawl karlak March thlasung doawknak a sosang vivo. Kaphnih doawknak a sosan vivo ruangah ramri dai aw mi India ram cun a ramsung kilhimnak lam tthan bet dingin thuneitu pawl in an fial tiah India thuthang hram pawl in an tarlang.
Ramri tluanah ramri kilhimnak latu palik le ralkap pawl nazi 24 sung, kilhimnak an lak thu, hivek doawknak raungah ramri lan ih India ram lam a lut tu Myanmar raltlan an um hrih lo tiah India ram, Manipur ramkulh Chief Minister Mr. N.Biren Singh in a sim.
Kan dung March ni 24 khal ah India-Myanmar ramri, Sagaing ramthen, Tamu peng, ကွန်းတောင်း khua ih mipi ralkap tangrual pawl ih camp pakaht cu SAC ralhrang pawl in an siim ih, mipi ralkap pawl in khamawknak ih an rak kahsal ruangah doawknak a sosang sinsin, ralhrang lam an nat ruangah Helicopter thawn a ra kah bawm.
Cuitlunah SAC ralhrang pawl cun Saingai ramthen sunglawng siloin Chin ramkulh lam khal ah nasa zet in thazang le eiin pe aw dingin nasa tak in an zuam ih Chin mipi ralkap pawl cun zin tluanah an rak kap. ralhrang lam in thi le hlo khal tampi an um.
Hi thuthawn pehpar in SAC ralhrang lam an naa zet ko nan tuini tiang doawknak thu hla an suah hrih lo. Asinan Tamu pengsung ih doawknak thu hla cu an mai media Fifty Tows News ah PDF ti aw ter pawl ih camp kan lak sak tiah an tarlang mi a um.
