India-Myanmar ramri, Chinram le Mizoram ramri ah March ni 22 zaan, nunau pakhat le mipa pahnih ruak, khawsung mipawl in an sar thu theih a si.
Thah a tuar mi minung 3 pawl cu March ni 19 zingah Mizoam, Saiha ihsin Myanmar ramri lam ah motor thawn, suak khawm mi an si tiah Saiha khawsung mipawl in an rel.
“Nunau nui hmin cu biak suai (suite) tin kan thei. Myanmar ihsin Mizoram ih vai an si. Mipa pahnih cu India ram mi an si tin kan thei. March ni 19 zinglam nazi 5 hrawngah motor thawn ramri lam ah an feh tlang” tiah an sim.
An pathum ih ruak cu hramlak hmun pakhat ah Ban hla hnan thawn khuh in, ramri ah tualsung mi, pakhat in a hmuh mi a si. An pa 3 ih ruak cu Saiha district, Ainet khua ihsin Saiha lam ah phurh tlun a si.
Hi thahawknak thawn pehpar in zawi kut in an thi, ziangruangah an thi ti cu theih a si hrih lo.
