Sagaing ramṭhen အင်းတော် pengah hmunram thlingthla in Ke ih feh Kawl ralkap pawl cu KIA le PDF ṭangrual in an rak do thu mizansun July 24 ah khan အင်းတော် Revolution cun thusuah an tuah. Kawl ralkap pawl hi bur 2 ih feh an si, zingpit nazi 9:30 hrawngah khan အင်းတော် peng မော်တိတ် hmunram အင်းတော် le ဗန်းမောက် karlak zinpi zawh ih ra feh Ralkap motor pakaht siseh hmunram nawr dingin Ke ih feh Ralkap mipum 70 rual lai cu KIA le PDF ṭangrual cun vawi le khat ah an rak do rumro mi a si.

An rak donak ah Motor sungih Ralkap 15 topawl lak ihsin mi 2 an thi, Ke ih feh Ralkap mipum 70 rual lak ihsin mi 4 an thi, Ke ih feh pawl hi hriamtuar khal an tam zet tiah an thusuah ahcun an tarlang. Kawl ralkap lam khalin nasa zetin an kap ve ih khat lam khat lam minutes 40 lenglo kahawknak a suak, KIA le PDF lam ihsin zohman mithi le siatsuah aw umlo in dung an sip thluh theisal.

Tui’ dinhmun ah Kawl ralkap pawl cu Indaw peng phungki tlawng ah ṭanhmun khuar in an um. Hmun dang dang khal vak peh vivo thei an si ih doawknak khal suak peh vivo thei a si thu Indaw Revolution lam cun an sim. Tufang te hi Kawl ralkap pawl cun Sagaing ramṭhen ihsin Kachin ramkulh sungah Ralkap thazang tamzet an kuat ih Kachin ramkulh sungah hin doawknak nitin deuh thaw a um ringring.

Hivekin Kawl ralkap lam in Kachin ramkulh nasa zetih an nuainak khal hi kan dunglai ih Ralkap council in Rampi remdaih thurelkhawmnak a rak sawm ṭum ih an tel duh lo ruangah asi ko ding tiin KIA thuphuangtu Ralbawipi Naw Bu cun a sim. Kachin ramkulh ih Kawl ralkap le KIA karlak kahawknak ah hin Kawl ralkap lam leipar doawknak ih ral an sun zet ṭheu ruangah tlun lam ihsin Jet Fighter hmangin nasa zetin an kap ṭheu tiah theih a si.