Gambia ram in Myanmar ralkap cu miphun thah cimihnak daan an buar asi tiih thubuai an tuahsakmi parah, cuvek thu thil diklo asi, Gambia ram hin Myanmar ram parah zianghman thubuai tuahsak theinak a nei lo tiih Ralkap concil lam elnak cu leitlun ih thuṭhennak sangbik ICJ cun a hnon sak ta riai

UN ih international court of justice – ICJ ah Gambia ram cun Rohingya miphun thah cimihnak thuthawn pehpar in thubuai an rak tuahsakmi cu Myanmar ralkap council lam khalin anmah le mah an thiamnak rellang in Gambia ram hin Myanmar ram thubuai a tuahsak theinak lamzin a um lo tiin ralkap council lam cun an dokalh mi asi. Cui’ Myanmar ralkap council lam ih dokalhnak thu thehlutmi cu ICJ thuṭhennak tlanghmun cun mizan July 22 ah khan an hnawn sak tiah theih a si. 

Hivekih Myanmar ralkap council lam ih dokalhnak thu pawl thawn pehpar in “Gambia ram cun miphun thah cimihnak thu ah International, leitlun huappi ih lungkim tlangmi hminkhennak an rak tuah ve ruangah Myanmar ram cu miphun thah cimihnak a um maw um lo, daan an bahbal taktak maw taktak lo tipawl thuṭhennak tlanghmun ah thubuai tuahsak thei an si tiin ICJ thuṭhennak tlanghmun cun thutluknak an tuahmi a si.

Himi ICJ ih Myanmar ram thubuai thawn pehpar in NLD party cozah sanlai ah kha cun Aung San Suu Kyi in simfiangnak a rak nei ih ralkap council san ahcun Min Aung Hlaing ih ruatmi ကိုကိုလှိုင် ih hohanak in simfiangnak an nei ve tiah theih a si.