Sagaing ramṭhen Hkamti pengkulh Palik sakhan Lockup ih khum mi Ramkhel thawngtla telin Thawngtla mipum 14 pawl cu Thawngin bauh ta hrat in an tlansuak ih mi 4 an kai ngahsal tiah Hkamti khawsung mipawl hnen ihsin theih a si. Tuisun October 18 zingpit khawvang hlan nazi 2 luan deuh hrawng ah khan Thawnginn kulhnak Thir cu Thawngtla pawl cun Thir tannak thawn an tan ih Palik pakhat an sŭn hnu ah a meithal khal an laksak ih an tlansuak, tlangsuak pawl lak ihsin mi 4 an kai ngahsal ih mi 10 an tlansuak ngah thei, tlansuak tupawl lakah ramkhel thawngtla mi 8 an tel tiah theih a si.
Palik pakhat ih kutkaih meithal G-3 pakhat an tlansuah pi thei, Palik sakhan Lockup ih an khum mi thawngtla pawl lak ah hin PDF tiin an kaih mi siseh Rittheihsi ruangih kaih mi khal an tel. Ramkhel thubuai ih an kaih mi case 8 an tel tiin kan thei, Hkamti khawsung mipi cun thawngtla pawl tlansuak thei thluh hram seh ti cu kan thlacamnak a si, an kaih ngahsal mi pawl khal hi an that ding maw ziangti takin lehlam an tuah ding kan theihpi ve lo, tuhi Hkamti khawpi sung cu Ralkap le Palik an khat sohso tiah Hkamti khawsung mi pakhat cun a sim.
Tuizing ih Hkamti Palik sakhan Lockup ihsin tlansuaktu Thawngtla pawl hi Mandalay Free Media cun PDF le KIA an kaih ngah mipawl an siih mi 5 an kai ngahsal tiin an tarlang ve thung.
Hkamti Palik sakhan lockup ih an khum mi PDF le KIA sungtel mipum 14 pawl cu tuizing khawvang hlan ah khan Palik sakhan an bauh ih an tlansuak, mi 14 tlansuak pawl sungin mi 5 an kai ngahsal tiah tualsung mipawl ih sim mi sirhsan in an tarlang. Hkamti Palik sakhan ih an khum mi PDF le KIA sungtel pawl hi kan dung August 30 sun ah khan Hkamti peng နန်စီပွန် lung mankhung laihnak khur sungah Ralkap pawlin an kaih mi an siih ziangti lamlam in an kai ngah thei timi cu thuhla fiangfel kan theih lo tiah tualsung mipawl cun MFP hnen ah an sim.
Hivekin Thawngtla 14 rori an tlansuah ruangah Hkamti khawpi kiangkap tluan cu nasa zetin an hawlih Speed boat le Motor veivak pawl khal an kham thluh, Tipi kap tluan siseh motor zinpi tluan tipawl an hawl nasa tiah theih a si.