Chin ramkulh Falam ihsin Hakha pan ih a pok tu SAC ralhrang pawl cu Hakha le Falam karlak peng 40 lawng feh dingah zarh khat an rei zo nan hmailam feh bet thei lo in tualsung mipi ralkap pawl in karlak ih an rak donak ruangah lamzin ih an tang thu theih a si.
SAC ralhrang pawl cu March ni 19 in Falam ihsin an pok ih peng 5 an thlennak Rih zin pial ihsin Chin ralkap pawl ih beihpi thlak an ton ruangah hmailam nor thei nawn lo in zarh khat an rei hnu hman ah Thlan rawn le Taal karlak ah an hran tang tin mipi ralkap pawl in an sim.
Tuisun khal ah Thlanrawn le Taal karlak ah mipi ralkap pawl in dirh bomb le meithal pawl thawn an rak do ih SAC ralhrang lam in thi hlo an um tiah ralram ih thuthang hram pakhat in a sim.
Anih cun “March ni 27 nazi 1:40 hrawngah CNDF/CNA tangrual in kan kan do. bomb thawn meithal thawn kan thua aw ko. Dirh Bomb puah ruangah kan mai zumnak ahcun minung 7 in 10 karlak an thih kan zum. Uico pawl cu thlanrawn le ttaal karlak ah an riak. kan kap aw rei lo. taal an rak lan thei lo. kan nih lam cu pathian zarah CNA khal kan mah CNDF khal kan zaten Pathian zarah kan him dam theh tiah a sim.
Hi SAC ralhrang ramri nortu pawl cu March ni 7 le ni 9 ihsin Kalay ihsin an pok suak hnu zintluan ah Chin mipi ralkap tangrual pawl in karlak ih an rak donak ruangah minung 30 lenglo an thi. Zarh hnih an feh hnu ah Falam an lut thei fang. Falam ihsin Zarh khat zik an feh zo nan Taal khawsung an lut thei cuang hrih lo. Kalay Falam lamzinpi cu ralhrang pawl in thuneihnak an lak hlan, boruak kel awh ih a rak um lai ahcun nikhat feh ih thlennak hmun a si.
