Chn ramkulh, Hakha khawsungih electric man khawng le mipi pawl hnok sak zawngih nan cangvai asile kan lo kap ding, kan lo kai ding tiah Hakha Circle council in tuini March ni 27 ah thu an suah.
Chin ramkulh SAC ralhrang Chief Minister in tuikum April thla thok ihsin Hakha khawsung electric man khawng dingin thu a pek mi cu electric tha peknak zungin meisa man khawng dingih an khaw khan mipawl an theih ruangah Hakha Council in a tuvek ih thu an suahnak a si.
Khawsung electric man khawng dingih thu petu ralhrang Chief Minister tel in zung hnatuan sang pawl, electric zung hnatuan tupawl in meisa man khawng in siseh, mipi pawl par ah hnaihnoknak an tuah mi kan hmuh a si le Hakha Circle Council in kahawknak, kaihawknak thawn hremnak pek nan si ding tiah mipi pawl hnenah theih ternak an nei.
SAC ralhrang pawl in dik lo zet in thuneihnak an lak hnu Myanmar ramsungah daan um cia mipawl hnol theh a si tiih an ruah thu, Curaungah Chin ramkulh Hakha khawsung khal ah dothlengnak sung thlun ding mi daan le dun fumfe zet ih an neih thu, cui daan le dun vek in hakha khawsung mipi pawl in Hakha Circle Council ih theihternak um lo in ziang siah hman pek a tul lo tiah thu an suah.
Thuneihnak latu pawl ih an din mi SAC ralhrang acozah hnuai ih electric zung ihsin Hakha khawsung mipi pawl meisa man an khawn dingih khaw khannak sungah hnam hnoih aw lo dingin le meisa man cu pe lo ding ah theih ternak an nei. Hakha khawsung cu CDF le CNA ralkap pawl tangkhawm in SAC ralhrang pawl thawn tu le tu an kahawknak hmun a si.
