Chin ramkulh, Falam ihsin Hakha lam a pantu SAC ralhrang pawl cu tuini March 25 zinglam nazi 10:00 kiangkap hrawngah Chin National Defense Force (CNDF) le Chin National Army (CNA) tangrual pawl in bom kam mi thawn an rak do ih SAC ralhrang minung 4 thi in, hriamhma ngah khal an um hnuaihni tiah theih a si.
“Rialti khua le Thlanrawn khaw karlak ah kan mah lam in bom kan rak dir ih ralhrang 4 an thi. Kanmah lam ihsin hriamhma ngah zo hman, um lo ten kan kir sal thei” tiah doawknak ih a teltu CNDF ralkap pakhat in a sim.
Mawtaw 20 kiangkap pawl thawn hmai a nor tu SAC ralhrang pawl cu Falam ihsin Hakha lam pan ih an pok ni, March 21 ihsin 25 tiang voi 6 lai do an tuar zo ih minung 10 lai an thih hlei ah hriamhma ngah tampi an um tiah CNDF ih tuanvo neitu pakhat hnen ihsin theih a si.
Mawtaw 20 leng thawn a poktu SAC ralhrang pawl cu March thla zarhkhatnak hrawng in Kalay ihsin Chin ramkulh, Falam le Hakha lam ah an pok ih hriamhrei le ei-in pawl, kuat awk ih feh mi an si.
SAC ralhrang pawl cu a tuvek in lamzin tluan ih kah an tuar ruangah tuizaan March ni 25 zaanlam nazi 4 hranwgah raldonak Jet Vanzam thawn bomb a ra thlak bet.
