Chin ramkulh, Falam peng ihsin Hakha khawpi lam ih pantu SAC ralhrang motor tlar pawl cu CNA le Chin tangrual ralkap pawl in an rak do ih thi le hlo an um hlei ah, Ni 3 sungah peng 5 lawng an thleng lai thu theih a si.
March ni 7 le ni 9 ihsin a pok suaktu SAC ralhrang pawl cu tank raldonak motor 2, motor 30 rual pawl thawn march ni 19 ah Falam khawsungah riak in Hakha ralhrang pawl ih hmun pi lam an pan sal mi a si.
“Falam an thlen ihsin Hakha lam pan in an feh lala. Ni 3,4 cu a rei zo. Ralhrang pawl lak ah raldonak motor pahnih le motor dang 30 a tel. kan mah CNA le Chin ralkap tangrual pawl thawn doawknak a suak. Cumi ah kan nih lam in hriam hma ngah kan um lo. ralhrang lam in minung 7 an thi. An nih pawl ih feh dan cu lamzinpi vorh lam ihsin kilhimnak an la aw. Cumi sungah ralhrang le palik minung 200 hrawng an tel tiin kan thei. Ralthuam le eiin phurh aw mi an si” tiah Salai Htet Ni in a sim.
Hi ralhrang motor tlar pawl cu CNA, CNDF, CDF-Siyin, PDF Zoland le MEDF pawl khal in Kalay-Hakha lamzin pi tluanah karlak in an rak do ih ralhrang minung 20 lenglo an thi. Boruak kel awh ih a rak um lai ahcun nazi 4 sung lawng fehnak dingah SAC ralhrang pawl cu zarh hnih zikte an rei. Cuitlunah peng 40 rawng lawng hla aw mi Falam-Hakha zinpi cu ni 3 an feh zo nan tuni tiang Falam ihsin peng 5 hlatnak lawng an thleng thei lai tiah Salai Htet Ni in a sim.
