Kan dung naite ih mipi ralkap pawl le SAC ralhrang pawl an kahawknak hmun Tamu tlunlam, Tamu-အောင်ဇေယျ lamzin ih ကွန်းတောင်း khaw thar cu SAC ralhrang pawl in March ni 25 le ni 26 ah ni hnih peh in inn an ur ruangah an khaw pawh in mei a kang tiah Tamu tualsung mi pakhat in a sim.
“Naiten cun kan hmu lo. khaw te tak te a si tik ah a zate a kang ding. Kan dung naite ih Tamu kiangkap doawkna a um ruangah zohman an feh ngam lo. Khawsung ih phone hman ding khal an harsat” tiah Tamu kahwsung mi pakhat in a sim.
ကွန်းတောင် khaw thar cu Tamu khawpi thawn peng 6 hrawng hla aw mi အောင်ဇေယျ lamzinpi par ih um si in, inn 29 lawng umnak khawte pakaht a si. Inn 29 um mi khua cu SAC ralhrang pawl in an ur ruangah inn 24 meisa a kangfai theh zo” tiah tualsung media Just You – Tamu in an tarlang.
Kan dung naite hrawng Tamu kiangkap ah tualsung mipi ralkap pawl le SAC ralhrang pawl karlak doawknak nasa tuk ih an neih hnu in, SAC ralhrang pawl in ကွန်းတောင် khaw thar cu a tuvek ih an ur mi a si.
ကွန်းတောင်း khaw kiangkap ih mipi ralkap hmun pakhat cu SAC ralhrang pawl in kan dung March ni 23 le ni 24 ah ramri an nornak in doawknak a suak ih mipi ralkap pawl in an camp an suah san hnu, an va do salnak ralhrang lam thi hlo an um tiah mipi ralkap pawl in an sim.
Hi doawknak ni hnih sungah SAC ralhrang pawl in vanzam hmangin an kah bawm aw. Doawknak sungah mipi ralkap lam in pahnih hnak ih mal lo in ram le miphun hrangah an nun an thap ih, ralhrang lam ih an thih hlohnak thu cu cipciar in theih a si lo.
Tamu khawpi ih tlanglam peng 7 hlatnak တမူး – ကလေး lamzinpi par ih Zohmun ဘုက္ကန် khua palik camp khal March ni 24 ah siim an tong. Cui palik camp cu an lak sak thei ih meithal zuun 15 le ralthuam phunphun khal lak sak an si tiah tualsung hriamkai National Liberation Army (NLA) in thu an suah.
Tamu pengsung doawknak a suah hnu in SAC ralhrang pawl cun khawsungah kilhimnak cik tak in mipi pawl an zoh tiah tualsung mipawl in an sim.
