Ralkap in rampi thuneihnak an lak ni ihsin sualnak a phunphun phuahkual mi tuahsak in an kaih mi Daw Aung San Suu Kyi cu sual an phawt mipawl lakih thubuai netabik a si mi Eiruk thubuai 5 pawl cu tuisun October 18 sun ih thuṭhennak tlanghmun an suahpi ṭum ah Naypyidaw thawngin thuṭhennak tlanghmun cun mawhsualnak a nei a si tiin an nemhnget ih hremnak an pek thu Lawyer pawl hnen ihsin theih a si.

Tuiṭum thubuai an tuahsak mi ah hin Daw Aung San Suu Kyi, U Win Myint le Dr. ဝင်းမြတ်အေး tipawl an siih Helicopter leinak le sannak thuhla thawn pehpar in Eiruk thubuai an tuahsak mi a si. Hi thubuai thawn pehpar in Daw Aung San Suu Kyi ih Lawyer pawl cun theihpitu pawl ko ih check felsal dingin Tlanghmun ah dilnak an nei ih October 25 sun ah khin thubuai tuahsaktu Anti Corruption Commission tlangsuak upa ဦးအောင်ခန့် le theihpitu dang mi 4 pawl ko in check felnak neih a si ding tiah an sim.

Daw Aung San Suu Kyi cu Ralkap council in thubuai 19 rori an tuahsak ih cupawl sungin thubuai 14 hrang cu thuṭhennak an tuahsak thluh zo ih thubuai 14 hrang kum 26 thawngtla ding dinhmun a si. Thubuai dang 5 tanglai mi Eiruk thubuai cu tuisun ah Tlanghmun cun hivekin mawhsualnak a nei a si tiih an nemhnget sak ruangah October 25 ah khin tlanghmun suahpi sal ding a si.