Syria ramsungah Iran ram ih somdawl mi ralthuam kai pawl in drone thawn an kahnak ruangah American ram mi Contactor pakhat a thi, tualsung mi pakhat le US ralkap 5 in hriam an ngah hnu in American ralkap cun mani sun ah vanzam thawn bomb an thlak tiah US ralkap hmun pi Pentagon in an sim.
US ralkap pawl do an ton thu, phuba laknak ih an kah mi a si thu Pentagon cun tlawngkai ni 4 zaan ah an sim. American ralkap pawl cu Syria ram saklam Hasaka khawpi kiangih an kah mi a si.
US ralkap pawl an donak ah Iran ram ih tuah mi thih cilh dorne an hman thu American thlingthlaktu pawl in an sim ih, hlan ihsin rak eng tai aw ringring mi Iran le American karlak pehtlaihawknak khal dinhmun tha lo lam a pan sinsin thei tiah mi thiam pawl in an sim.
American humhimnak ministry zung cun hi doawknak cu President Joe Biden ih thupek in an tuah mi si in, Iran Isalam dothlengnak ralkap (IRGC) le an rualpi pawl umnak inn pawl hmui tin ih an kah mi a si tiah a sim.
American ralkap pawl cu 2021 kum hnu lam, Iran pawl ih bawm mi ralthuam kai pawl ih donak vei 78 an tuar tiah American Middle east ralkap hmun pi ih thuneitu General Eric Kurilla in a sim.
