Chin National Army (CAN) le Yaw People Defense Force (YPDF) karlak humhimnak lam thawn a pehpar mi theihpitawknak hmin khen (MoU) cu March ni 21 ah Victoria Base ah dan vek in hmin an khen tlang thu theih a si.
Humhimnak thawn pehpar mi kaphnih kom aw in hnatuannak hnget khauh sin dingin hmin kan khen tlangnak a si tiah YPDF ih central Committee hotu Yaw lay in a sim.
“Chin le Yaw cu ramri dai aw mi a si. Cuisin a tak ram khal ah humhimnak pawl ah tuankhawm tlangnak kan nei. Ahlan ihsin tuantlangnak cu kan nei zo. Tu lawngah dan vek in hmin kan khen tlangmi a si” tiah a sim.
Cuitlunah a tuvek ih kap hnih hmin khennak ah ramkhel thu lam a tel lo nan, dothelngnak tonteh nei tam mi ralkap bu ih khaw khan lairelnak zawn lungnak khal a si vek in, rallam ih tluantlangnak hrante a si tiah a sim bet.
“CNA cu dotlengnak ih tonteh nei tam mi pawlkom an si. Kan nih cu tu lawngah kum hnih lawng kan si lai. Curuangah ton tehnak nei tamtu pawl hnen an mai ralrel khaw khawn dan zawn lung tluk a si. Hmin khen timi cu ahleice in rallam tuantlangnak a si. Ramkhel lam ahcun Chin khal in an mah ten, Yaw khal in a mah ten a tuah ding” tiah a sim.
Hi theihpitawknak hmin khen cun thalpau dothelngnak a theh tiang, daih ding asi ih, thuneihnak latu pawl an hram cimitnak ding, mahte lairel theinak ding hrang CNA le YPDF karlak lungkim tlangnak la in kan tuah mi a si ti khal in a sim.