Matupi Khawpi လေမျိုချောင်း Lilawn kiang doawknak ah CDF Matupi pawlin Kawl ralkap 5 an kap that, mi 4 in hriam an tuar

Chin ramkulh Matupi khawpi လေမျိုချောင်း Lilawn kiangah mizansun July 25 zinglam ṭausang nazi 11 hrawngah khan tualsung hriamkai CDF Matupi le Kawl ralkap karlak nasa zetin kahawknak a suak ih cui’ an kahawknak ah Kawl rlakap 5 an thi, mi 4 in hriamhma an ngah thu le CDF Matupi lam ihsin zohman mithi le siatsuah aw an um lo thu tipawl CDF matupi cun thusuah an tuah.

Mizansun ih CDF Matupi le Kawl ralkap pawl doawknak လေမျိုချောင်း lilawn hi Matupi le Mindat karlak zinpi ih um asiih Matupi khawpi ihsin peng 5 tluk hlatnak ah a um. Kawl ralkap mipum 10 hrawng cu လည်မြို tiva lam ah lamzin pawl thianfai dingin an ra ih Tualsung hriamkai lam cun an rak kahmi a si. Ralkap pawl hi Lei laihnak cet khal an kengtel, sunhnu lam pi tiang လည်မြို tiva kiangah an um rero lai tiah CDF Matupi hotu pakhat cun a sim.

CDF Matupi pawl ih hmunhual ramsung ah hin doawknak nasa zet suak peh thei vivo asi thu khal an thusuah mi vekin theih a si. Kan dung baite khalah Matupi peng ရဲန်ခဲန်း khua le အမ်းလိုင်း khaw karlak ah kahawknak a suak ih Kawl ralkap lam ihsin Warrant Officer telin Ralkap 3 an thih thu CDF Matupi cun an tarlang.