Kalay khawpi ihsin Hakha khawpi ih SAC ralhrang hmunpi hrang eiin, ralthuam phurh aw tu SAC ralhrang pawl cu zarhkhat hnih hrawng an feh hnuah Falam khawpi an lut thei. Falam ah zaan khat riak in March ni 21 ah Hakha lam pan in an pok sal nan peng 4 hrawng lawng an feh ah CNDF, CNA tangrual ralkap pawl in bomb puah in ralthuampi hmangih an rak kah ruangah thi le hriam an um thu theih a si.
CNO DS cun “tuisun ih ralhrang pawl bomb an rak puah an timi kha a dik ko. Ziangzat an thi ti cu kan thei fiang lo nan, a hmun ih thi tla an um ih, Falam siizung lam ih thi khal an um. Minung 5 hrawng cu an thi men thei. Fumfe in kan thei hrih lo. an motor pakhat khal a siat” tiah a sim.
SAC ralhrang pawl cun thalpau luh zawngah kum tin eiin ralthuam an phurh aw theu. Kum dang khal ah tuvek tik cu ah eiin le ralthuam an phurh aw theu tiah dothlengnak tuahtu pawl in an sim.
Tuittum ih SAC ralhrang Chinram hungsotu pawl cu pakhat hman kir thei nawn lo ding tiangin a cang thei tawk in kan kham ding tiah CNO DS in a sim.
Anih cun “Tui ttum cu kan rek that ding. Nasa tak in tim tuahawknak a um. Tui ttum cu kan nuai theh ding. Pathian in umpi dingih timtuahawknak khal a nasa tuk. Kan kharh khum tum mi a si. Pathian in umpi dingih Hakha an thleng lo ding. An kir lo ceng a si ahcun an cem ding” tiah a sim.
SAC ralhrang pawl cu March ni 7 le ni 9 ihsin Kalay khawpi in Chnram lam pan in, an so thok ih lamzin tluan ah Chin mipi ralkap tangrual pawl in nasa tak ih an rak kah ruangah le zarh hnih lenglo an rei zo nan an tum ram an thleng thei hrih lo.
