Sagaing ramthen, Kalay peng, Nitlak saklam, Chiantakyi khua cu March ni 30 ah SAC ralhrang pawl in an luh cilh ih tualsung mipi ralkap pawl thawn zinglam nazi 10 hrawngah kahawknak a suak.
Ralhrang pawl hivek ih ramri nor ruangah mawh nei lo mipi umnak khawsung an luh cilh ih khawsung mi tampi cu a himnak hmun hawl in ral an tlan theh.
SAC ralhrang pawl khuilam ah an feh an tlung zo maw? A him ngaingai maw tin mipi lak ah thusuhawknak a tam zelzel lai. Himi thuthawn pehpar in SAC ralhrang pawl khuilam an pan ti hi zo hman in fumfe ih thei tu an um lo ram pa hloh in an hlo ih, fimkhur zet ih kan um a tul lai thotho.
Hi thuthawn pehpar in CNDF Brigade 4 ralbawi cun “Ralhrang pawl an fehnak hmun hi kan thei fiang thei hrih lo. Chiantakyi khawsung cu kan mah kan lut zo. Khawsung thianfainak kan tuah theh zo. Inn pahnih hrawng an ti siat mi a um. Khuinah lam an pan ti kan thei fiang theih hrih lo. Cawngright lam kan sut kan hmu lo an ti, Sakhankyi lam khal kan sut ih cuvek an feh awn kan thei lo an ti theh. Curuangah hmun pakhat khat ah an relh a si ding. Fim kur zet ih um kan tul lai” tiah a sim.
SAC ralhrang pawl cu a liam cia mi kan dung March ni 27 khal ah Letpanchaung khawlu vengthar lam ah ralthuampi vei 5 an kap ih, vei hnih khawsung ah tla in vei 3 a thlaknak thei lo in a puak awn lawng theih a si. Himi tum ah khawsung mi pakhat in nunnak seherh um lo ten hriam hma a ngah.
