Mizoram, Saiha district mi, minung pahnih le lawngtlai district mi pakhat India-Myanmar ramri Myanmar ramsung ih ruak an sar mi thuthawn pehpar in thu hle theih bet ding a um vivo.
Kan dung naite ih Myanmar ramsungih ruak an sar mi Suitei Cinzah tiih theih mi@C.Biaksuaii (48) le Bablu Talukdar (37) new Saiha khawsung mi veve le B.Lalthanfamkima kum (22) pawl an thatnak thu ah Saiha palik pawl cun IPC Section 302/363/364A/341/342/343/346/379, Foreigners Act section 14 le MV Act section 181 pawl hmangin thu buai tuah sak an si.
A thok ahcun an nih pawl hi Myanmar ramsungah, paisa pe aw ding vek ih an rel mi cu riffle leinak ding hrang paisa va la bet in le mina dam lo hruai dingin Ainak khua ihsin Myanmar lam ih lut mi an si tiah Saiha palik pawl in an sim.
C. Biaksuii le Bablu Talukdar tei pahnih cu an mai hmel theih mi pakaht in March ni 19 zinglam nazi 4 hrawngah an inn ihsin hruai suak in B.Lalthafamkima motor thawn Ainak khua lam pan in an suak. Zing nazi 7:30 hrawngah Ainak khua cu thleng in cumi ihsin Myanmar lam pan ih feh an si. Inn lam an kir nawn lo tik ah an sung kaw pawl in an hawl ih March ni 22 (tlawngkai ni 3) zaan ah an ruak cu Myanmar ramsung ramri ah an sar. An mah thah a si hnu ah an ruak khal meisa thawn an ur ding zum a si.
A thok ahcun an nih pawl hi Myanmar ramsung thuneihnak latu ralhrang pawl a do rero tu CDF pawl raltuam rak lei sak tu an si ih, ralthuam leinak ding hrang sumpai an pek awk mi an ti cingpeng ruangih thah an si ding zum a si. A thok lam ih palik pawl ih thu hla an theih dan ahcun February thla thok lam ah Biaksuii, Lalnunsiami le an mortor maungtu pawl cu Myanmar mipakhat hruai dingin Ainak khua ah an feh. Myanmar mi, CDF Vuangtu mi tiih an zum mi pakhat cun Myanmar paisa dip thawn fun mi (India paisa in thawng 500 le thawng 50) cu keng in AK-47 rifle 6 lei dingin an fial aw. Meithal cu an lei lok thei lo ruangah hmuh thiamawk lonak an karlak ah a suak. Paisa an pek awk mi kim lo vek in an puh aw ton rero. A lehhnu lam ah cun an paisa pek awk mi cu India Rs. Thawng 500 lawng a rak si.
Hivek ih thu hla a um sal ihsin CDF pawl kut in a thi tiih an rak zumnak a reh deuh ih, Myanmar ralhrang pawl hnen ih tlanlut tu Myanmar ralhrang pawl in an thah a si ding tiih rak zum tu khal an um. Cuvek thotho in Meithal sumdawnnak tuah tu pawl kut suangin an thi si ding tiih a zum tu khal an um. Hi tei pathum ih ruak cu khawsung tlawmngaitu pawl in kuang tuah sak in thuneitu pawl in Post mortem an tuah hnuah an khaw lam ah tlun in an vuiliam.
