Belarus ram ah Strategic ralrel Nuclear ralthuam hung dingin Belarus President Alexander Lukashenko thawn lungkim tlangnak kan nei zo tiah Russia President Vladimir Putin in a sim.
Belarus ramsung Nuclear ralthuam hung dingah Lukashenko in dilngennak a rak neihnak a rei zo tiah Russia ramsung media pakhat in Putin tonsuhnak aneih mi ah a tuvek ih a sim mi a si.
American ram khal in a thu rualpi NATO ralkap ramdang pawl ah Strategic ralrel Nuclear ralthuam pawl a hung theh zo tiah Putin in a sim. Russia le Belarus cun Nuclear ralthuam hung dingin lungkim tlangnak an nei ih, a tuvek ih an lungkimnak hi Nuclear ralthuam karh zai lo dingih leitlun dan thawn a kalh aw lo tiah Putin in a sim. Ikenda missile pawl cu Belarus ram ah a rak pek zo ih, Belarus ram ih raldonak vanzam pawl ah Nuclear ralthuam pawl hman a theih men thei tiah Putin in a sim.
British ram in Ukraine ram ah raldonak Tank pawl bawm dingih an khaw khannak cu Putin in nasa ten a mawh thluk ih, Russia cun tuvek ih an thil tuah parah kan lehrual sal ding tiah an sim. Raldonak Tank motor tel in ralthuam dang pawl an tuahnak khal kan tthan ding tiah Putin in a sim suak. A thar an tuah dingmi raldonak Tank pawl thawn Russia ram ih an neih dingmi raldonak Tank cu Ukraine ralkap pawl hnak in a let 3 in a tam ding tiah a sim bet. UKarine ram khal cun Nitlaknak ram pawl ih bawmnak an pek mi raldonak Tank, Jet vanzam pawl hmang in an ram nisuahnak lam Bermud ramah raldo an thok thlang ding thu theih a si.
