Kan Chin Cafang ih thupi zet pakhat asi mi Ṭṭ hi tui’hlan ahcun Phone ah siseh, Computer ah siseh duhduh ih hman theih in a rak um lo. Asinan tu ahcun iPhone le Android phone ah siseh Computer Microsoft Windows le Apple Computer pawl ah hman theih an si thluh zo. Cui’ Ṭṭ cafang iPhone le Android ih khumdan le hmandan pawl cu Video in ka rak tuah zo. Cun Microsoft Windows Computer hmangtu pawl hrang khal Ṭṭ cafang awlsam tei’ hman theih dingin ka rak tuah zo.
Tuiṭum ahcun Mac (Apple Computer) hmangtu mi tampi’n in rak request ringring ṭheu mi Apple Computer (MackBook, iMac, Mac Pro, Mac mini) tipawl hrang Ṭṭ cangfang thundan le hmandan ka run lo hmuh ding a si. Zirnak sungih kan luh hlan ah thu pakhat te ka lo cah duh, kan Ca hman si lomi Ar cawngthai mi vek Kawlca hman taimak suah in kan zir ih kan ngan paih asi ahcun Pathian ih in pek mi kan Ca hi kan ngan ṭenṭo cio kei uh.
Cun ziangruangah kan Ca kan ngaithupit a ṭulih fumfe zetin kan thiam a ṭul ti asile, tu cun san acangkang vivo, thiamnak khal a sang sinsin, kan ṭawng te rorin Translator app tla tuah thei dingin rualpi thawn kan zuam rero. Cumi Translate App cu ziangvek asi tile, Laica ih kan ngan mi cafang le catluanpawl Mirang in amahten atican a run simfiang ding, cun Mirang cafang le catluan kan ngan mi khal kan ṭawngin atican simfiang cih thei mi translator app a si.
Cutik ah kan Cafang pawl kawmdan dikten le catluan dikten na ngan thiam lo asi ahcun na Ngan mi kha tican dangpi ah a suak pang thei. Ṭhimnak ah cafangkăwm ding zawnah kăwm loin na um asile, atican a dangpi ah a suak ding, cun kan nih cun Ṭṭ cafang rori kan hmang dingih nangin Ṭṭ cafang rori hmang loin Ṭṭ ai ah t double tivek, t hnuai ih comma ummi tivek thawn na ngan asile, a tican a suak thei lo ding.
Cun double vowel (awphei thuahhnih) tivekin na ngan asi khal le atican a lang thei lo ding. Curuangah kan Ca hi cafangkawm dik, catluan dik, ngandan dikten kan ngan thiam a ṭul, kan zir ih kan ngaihsak a ṭul kan ti ringring ṭheunak a si. Cafangkawm le Catluan felfaiten nei zopawl ṭhimnak ah kan Unau Mizo tla khi an hrangah Translate App tivek tla tuah a har lo, Kawl an si khal le cu thotho.
Curuangah kan nih khal Pathian ih in pekmi kan Ca hi thiam tengteng kan tum kei uh, zovek mifim, mithiam, leitlun ih thiamsang bik khal mai’ ṭawng le Ca fumfe zetih thiam lo an um lo. Mai’ ṭawng le ca thiam hlir an si thluh. Ziangtluk na zirsang, na thiamsang asi khal le na Ṭawng le Ca na thiam lo asi ahcun sambau mi na nei lai tinak a si. Kan Ṭawng le Ca hi fumfe zetih thiam dingin kan zuam cio kei uh timi ka lo sawm duh.
Mitu ih sim zo bangin, Ṭṭ cafang khal tu ahcun phone ah siseh computer ah siseh duh duh in hman a theih thluh zo ruangah Ṭṭ cafang ai ah T double tivek si maw, lole t hnuai ih Ar cawngthai mi vekin ṭek riairiai tivek si maw, hmang nawn lo hram uh si. Ṭṭ cafang hi kan ca rori, kan ca diktak a si, Ṭṭ cafang silo a dang cafang Ṭṭ ai ih hman mipawl khi cu phuahcawp an si ruangah a dik lo. Kan Ca siatsuahtu sawn an si. Hmang nawn lo hram uh si. Kan mai’ ca hi kan mah rorin urhsun in uar deuhdeuh uh si timi ka lo fawrh duh.
Kan Lai cafang ih Awthluk Hminsinnak (Diacritical Marks) pawl hi kan Ca hmaisabik in rak tuahsaktu British ralbawi Captain J. E. D. Prothero, I. A khalin a rak hmang zet. Curuangah himi diacritical marks pawl hi kan phuahcawp men a si lo, kan Laica hmaisabik ihsin kan rak neih cia mi an si.
Asile, tu ah Apple Computer hmangtu pawl hrang ziangtin kan Computer sungah Ṭṭ cafang kan thun ding timi kan zoh tlang hrih pei. Himi Ṭṭ cafang hi Font in ka tuah mi a si loih Software phun khat asi ruangah Ṭṭ cafang na ngan mi hi a rak hmutu pohpoh in an rak siar thei thluh ding. Font kha cu a ṭhat lonak cu Font rak nei lotupawl in an rak siar thei lo. Tui’ ta hi cu Software phun in ka tuah mi a siih a hmin ah Chin Net tiin ka ret.
A hnuai ih Download nak Link (Google Drive) ihsin File na download ṭheh tikah Video rak zoh awla a tuahdan ka simdan vek ciah in thlun awla a ngah cih ko ding.
https://drive.google.com/file/d/1Ps4z-_NkQZmBBdV5Ln1NQ0yaohO8hfwD/view?usp=sharing
–
Install tuahdan Video zoh aw
–