Chin ramkulh, Kanpalet pengsung, khaw then khat pawl ah nauhak sung sia, sungdawk nat a um ih March ni 18 ni ah kum 5 hnuai nauhak pahnih an thi tiah tualsung mipawl in an sim.
Khaw tam sawn ah sungdawk nat an tuar ih siivai tuam hlawmnak le feh suksonak a harsat tlunah siivai daihawknak lonak ruangih thi an si tiah tualsung mi hnen in theih a si.
“Khaw dang pawl khal ah sungdawk nat a um. Siivai hlawm aw ding khal in a feh suksonak sumpai kan nei lo. Dr. le nurse khal khawsungah an um lo. sungdawk nat khamnak ding hrang thu simtu ding le siivai kan tul tuk” tiah khawsung mi pakhat in a sim.
Kanpalet pengsung nauhak sung sia, sungdawk nat a tam ruangah nauhak thi an tam vivo thei ih tik cu khel ih khamawknak le siivai thawn hlawmawk theinak ding hrang a rang thei bik ih an tul thu tualsung mipawl in an rel.
Kanpalet khawpi ih an hman bik mi lamzinpi cu SAC ralhrang pawl in feh an kham ruangah khawte ih um, mipi pawl hrang khawpi feh dingin harsatnak an nei ih, cui harsatnak cingfelnak ding hrang khawpi 3 pehtlaih theih mi lamzin thar khal Mipi zatlang kaihruaitu pawl in a liamcia mi zarh sungah a onnak an tuah thu theih a si.
