တနင်္သာရီ ramṭhen သရက်ချောင်း pengih thla khat lenglo sung tualsung hriamkai le Kawl ralkap karlak doawknak ah Kawl ralkap lam ihsin mi 90 hrawng mithi le hriamtuar an um tiah သရက်ချောင်း PDF ဒေါင်းမင်း Mission cun thusuah an tuah. An caan pawl hi kan dung Jun 3 ihsi khan an thawkih tui’thla July 10 tiang kha asi, cui’ an doawknak ah tualsung hriamkai lam ihsin ဒေါင်းမင်း mission, ကယ်စဒိုကျား PDF, North PDF, People’s Federal mission tipawl an ṭangrual ih mi 8 nunnak an liam, mi 1 in hriamhma a tuar tiah theih a si.
June 3 sun ah khan သဲချောင်းကြီး khua ih ṭanhmun khuar Kawl ralkap pawl cu tualsung hriamkai ṭangrual pawl cun an va siim ih hi ṭum ah Ralkap 12 an thi, mi 16 lai in hriam an tuar, Kawl ralkap pawl cu သဲချောင်းကြီး khua ah um ngam nawn loin စုံစင်ဖျား khua ah dung an sip thluhsal tiin an sim. Tualsung hriamkai lam ihsin mi 2 hriam an tuar, PDF pawl cun သဲချောင်းကြီး khua ih ṭanhmun khuar Kawl ralkap pawl an dawi tlan thei tun ah Pyosawṭhi sungtel ṭhenkhat khal an kaih thu an sim.
Cun June 25 sun khalah စုံစင်ဖျား meithat zung (Fire department office) ih ṭanhmun khuar Kawl ralkap pawl cu PDF ṭangrual cun an va kapsal ih ralkap 2 an thi, Ralkap pawl hnen ihsin hriamhreipi cerek mu 3 khal an laksak ngah thei. June 29 khal ah စုံစင်ဖျား tlang ih ṭanhhmun khuar Kawl ralkap pawl cu a thupten an va dosal lala ih hi ṭum an doawknak ahcun Ralkap lam mithi zet a cekci theihfiang a si lo. Cui’ hnu ah Kawl ralkap mipum 400 rual lai cu bur 3 ah ṭhen aw in hmunram an nawr ih Ralkap bur khat pawl cu သဲချောင်းကြီး an thleng tiin an sim.
July 3 sun ah Kawl ralka le an tefarual BGF pawl cu Tipi par in siseh Leipar in siseh hriamhreipi pawl nasa zetih kap phah in ကျွဲခြံ khua an ra feh rero lai cu PDF pawlin Bomb an rak puah dumdo ih hi ṭum khalah Ralkap 12 an thi, mi 20 hrawng in hriam an tuar tiah theih a si. July 3 sun an doawknak ah hin ဒေါင်းမင်း mission ih an hotu pakaht a thi ih sungtel dang 2 in hriam an tuar. Cun july 6 sun khalah သဗြုချောင်း khaw lam ihsin ra thlengtu Kawl ralkap le BGF pawl cu Ke pal bomb an rak puah lala ih mi 5 in hriam an tuar, an lak ih mi pakhat cu a hriamhma a bese zet thi thei dinhmun a si tiah an thusuah ah cun an tarlang.
Cun July 7 sun khal တောင်ပျောက် khaw lam pan ih ra feh rero Kawl ralkap le BGF pawl cu tualsung hriamkai ṭangrual pawl thawn doawknak a suakih Kawl ralkap le BGF lam ihsin mi 7 an thi, tualsung hriamkai lam ihsi khalin Federal mission sungtel 2 an thi ih tualsung mi pakhat khal a thi. July 10 sun ahcun ကျောက်လှေကား lam ihsin ra luttu Kawl ralkap le BGF pawl cu PDF ṭangrual in an rak dosal lala ih Ralkap le BGF lam ihsin mi 9 an thi lala, mi 3 in hriam an tuar bet, tualsung hriamkai lam ihsi khalin mi 5 an thi tiah an thusuahmi ah an tarlang.
Myanmar ramsung ralbuainak thupawl hi tualsung hriamkai lam cun official in thusuah an tuar ringring ih NUG khalin nitin doawknak thu thusuah an tuah ringring ṭheu. Sihman sehla Ralkap council lam cun vawi khat te hman Ramsung ralbuainak thu hrimhrim official in thusuah an tuah dah lo.