Kayin ramkulh, မြ၀တီ pengsung ih SAC ralhrang pawl ih gate le hmun an khuarnak cu KNU hohanak thawn tangrual ralkap pawl in March ni 25 zinglam ah luh cilh in an do ih thi le hlo an um vek in ralthuam thilri khal an lak sak ngah thu KNU thuthang hram hnen in theih a si.
“သင်္ဃန်းညီနောင် camp lamzin kap ih ta an va kap. cuvek ih an kah ruangah ralhrang lam minung 20 an thi. Ralthuam pawl khal lak sak an si. Meithal 20 hrawng an lak sak” tiah KNU thuthang hram in a sim. Hi an kahnak hmun cu gate tin an ko nan sumpai, an mi dilnak hmun lawng a si tiah a sim bet.
“kan nau le pawl in luh cilh in an kap. an kah theh in an nawh sak. Ralthuam thilri pawl an lak sak ih an tlan san. သင်္ဃန်းညီနောင် le မြ၀တီ tluan ahcun a buai ringring. Ahleice in Asia lamzin pi tluan ah buainak a suak” tiah KNU thuthang hram in a rel.
Mani zing, zing nazi 9 hrawng tiang မြ၀တီ ah kahawknak a um rero lai tiah Kareni hriam kai pakhat ih tuanvoneitu in a rel.
“သင်္ဃန်းညီနောင် le pursumnak zone an la theh zo an ti. Khiang hrawngah SAC ralhrang thi tu an tam nasa” tiah a sim. Doawknak sung SAC ralhrang pawl thi le hlo an tam ruangah SAC ralhrang pawl cun ralthonak Helicopter hmangin an kap tiah tualsung mipawl in an sim.
မြ၀တီ ၊ ကော့ကရိတ်၊ ကျုံဒိုး၊ Asia lamzinpi hmun (4) sungah dothlengnak tuahtu mipi ralkap tangrual pawl in ralhrang pawl cu tu le tu an kah tiah theih a si.
“ကော့ကရိတ် khawpi kiang rori ih doaw mi an si. တမိုင်ကုန်း ah an kap aw. SAC ralhrang pawl in ralthuam pi thawn an kap ih tualsung mipawl hriam ngah an um tiah kan thei” tiah တမိုင်ကုန်း khawsungmi pakhat in a sim. Hivek ih doawknak a suah ruangah Myiawady Thailand ramri ih um meesauh gate cu khar a si lawk nan tu ahcun an ong sal zo.
