Pekhu ramthen, Taungngu khawpi saklam ih ralhrang pawl ih Taung ngu vanzam hmunpi cu Rain of fire hmin in KNLA le PDF tangrual ralkap pawl in short bomb thawn vei hnih an kah thu Peku PDF pawl in an sim.
March ni 25 ah short bomb 4, March ni 27 ah short bomb 4 thawn an kah mi a si ih nikhatnak ah zung hnatuantu pawl an umnak saklam vanzam tlannak lam ah a tla ih a puak. thilri siat mi cipciar in theih a si hrih lo tiah an sim. March ni 27 an kah mi ahcun ralhrang vanzam camp sung bomb godown kiang, Vanzam tii khawlnak kiang le vanzam godown kiangah a tla puak ih vanzam camp ihsin meisa khu nasa tuk in a suak.
Ralhrang pawl thawn nai vai mi thuthang hram pawl ih an rel dan vek asile March ni 27 ih an kah mi ah ralhrang minung 3 an thi ih Helicopter pakhat a siat tiah Peku PDF pawl in an sim. Ralhrang Vanzam hmun an do theh hnu in SAC ralhrang pawl cu motor, motor cycle thawn feh in ဒိုးအင်း khawsungah lut in zohfelnak an nei rero tiah tualsung mipawl in an sim.
Dothelngnak tuahtu pawl ih an donak ruangah Vanzam tualrawn sung tiangah ralrelhnak tank khur, Bomb khiannak khuar pawl an lai ih, ralhrang pawl cu thlapang dede in an um tiah tualsung mipawl ih an sim thu Peku PDF pawl in an rel. Peku ramthen sungah ralhrang pawl cu nitin deuh thaw in kah an tuar ih, a thi tu khal nikhat hnu nikhat an tam sinsin. ralhrang Vanzam tualrawn an kah mi thawn pehpar in Ralhrang lam cun ziang thu hla hman awn au an nei hrih lo.
